KUFIKIA KILIMO BIASHARA WATOTO WAANDALIWE KUWA WAFUGAJI

Posted on: August 7th, 2022

Na Elinipa Lupembe

Jamii imetakiwa kuwaandaa watoto kuwa wajasiriamali wafugaji kwa kuwaanzishia ufugaji mdogo wa sungura nyumbani ikiwa ni mkakati wa kufikia Ajenda ya10 -30 ya Kilimo Biashara.

Sungura anauwezo wa kuongeza mnyororo wa thamani, kwa mfugaji mbali na nyama na mbolea, mkojo wa sungura huuzwa kwa ajili ya dawa ya kuulia wadudu kwenye mboga mboga na matunda.

Rai hiyo imetolewa na Daktari wa Mifugo halmashauri ya Arusha Dkt. Yohana Kiwone, wakati akielezea mkakati wa kufikia Ajenda ya 10 - 30 ya Kilimo biashara, kwenye maonyesho ya kilimo Nanenane Kanda ya Kaskazini, yanayofanyika kwenye viwanja vya Themi - Njiro jijini Arusha.

Dkt. Kiwone amefafanua kuwa ili kuwa na jamii ya wafugaji wajasiriamali, wanaoendana na mabadiliko ya Sayansi na teknolojia, ni vema kuwaandaa watoto kwa kuwafundisha ufugaji wa sungura tangu wakiwa wadogo na baadaye kuendelea kuwa wafugaji wakubwa katika maisha yao ya utu uzima.

Amesema tafiti zinaonyesha watoto wengi hasa wa kiume wanapenda  sungura, wazazi na walezi tumieni fursa hiyo kuwawezesha watoto kufuga sungura nyumbani huku akisisitiza  ufugaji wa sungura kuwa ni rahisi, unafanyika nyumbani kwenye  eneo dogo, sungura wakiwa na uwezo wa kuzaa watoto 8 mpaka 12 kwa uzao mmoja.

"Watoto wanapenda sana sungura, ni rahisi kumuwezesha mtoto kufuga sungura nyumbani, yakiwa ni maandalizi ya kuwa mfugaji hapo baadaye akiwa kwenye maisha yake, sungura anabeba mimba kati ya siku 5 -35,  na wana uwezo wa kuzaa mara tano kwa mwaka, sungura ambao watauzwa na kufanyika kama chakula cha nyumbani" amesisitiza Dkt. Kiwone.

Allan Salvatory, ni mfugaji wa sungura, kitongoji cha Mbalakai, amekiri yeye na rafiki zake kupenda sungura na wanampatia kipato ambacho hutumia kununua mahitaji yake ya shule huku wengine wakitumika kama kitoweo nyumbani.

"Mimi ninafuga sungura, niliona kwa rafiki yangu anafuga, nikamamua kununua sungura wawili na kuanza kufuga, sungura wana faida, wakikua nawauza, nimeambiwa mkojo wake hutumika kuulia wadudu, bado sijaanza kuuuza huwa nawagawia watu bure". Amesema Allan

Naye Abdal Mvungi mtoto anayeishi Sekei, amekiri kuwa, ni rahisi kufuga sungura kwa kuwa mlo wao mkuu  ni pumba, majani na maji, ana uwezo wa kuwahudumia mara baada ya kutoka shuleni, na ukuaji wake huchukua miezi 8 -10 kuliwa.

SHIRIKI SENSA YA WATU NA MAKAZI 2022

JIANDAE KUHESABIWA 23.08.2022 ✍✍