MBUNGE NOAH LEMBRIS:  ARUMERU MAGHARIBI IMEPATA FEDHA NYINGI ZA MIRADI YA MAENDELEO KWA AWAMU YA SITA.......

Posted on: December 20th, 2022

Na Elinipa Lupembe

Mbunge wa Jimbo la Arumeru Magharibi, Mhe. Noah Lembris amesema kuwa katika kipindi cha awamu ya sita, Jimbo lake limepata fedha nyingi za kutekeleza miradi ya maendeleo tofauti na awamu zilizotangulia.

Mhe. Noah ameyasema hayo wakati akitoa salamu kwa wananchi waliohudhuria hafla fupi ya makabidhiano ya mradi wa ujenzi wa vyumba 38 vya madarasa halmashauri ya Arusha, hafla iliyofanyika kwenye viwanja vya shule ya msingi Mringa.

Mbunge huyo ameeleza mafanikio ya serikali ya awamu ya sita inayoongozwa na Mheshimiwa Rais Dkt. Samia Suluhu Hassan, ambapo Jimbo hilo la Arumeru Magharibi limepata fedha nyingi za kutekeleza miradi ya maendeleo katika sekta za Elimu, Afya, maji na miundombinu ya barabara, miradi ambayo imeondoa kero zilizokuwa zikiwakabili wananchi wa jimbo hilo kwa muda mrefu.

Amesema kuwa licha ya kuwa mwaka 2022 serikali imetoa shilingi Milioni 760 za kujenga madarasa 38 kwa ajili ya kuwapokea wanafunzi wa kidato cha kwanza mwaka 2023, amebainisha kuwa fedha hizo ni sehemu ndogo ya fedha ambazo serikali ya awamu ya sita imezitoa jimboni humo.

"Milioni 760 ni sehemu tuu ya miradi iliyotekelezwa na Serikali ya CCM ndani ya ndani ya Jimbo hili, lakini serikali imetoa shilingi  Bilioni 22 za ujenzi wa barabara yenye urefu wa Km 18 ya kutoka Mianzini, Timbolo, Sambasha mpaka Ngaramtoni, yote hayo ni mafanikio makubwa ndani ya Jimbo letu la Arumeru Magharibi kwa muda mfupi sana". Ameweka wazi Mhe. Noah.

Ameongeza kuwa wananchi wa Arumeru Magharibi wana kila sababu ya kumshukuru Mheshimiwa Rais kwa miradi mingi ya maendeleo ambayo inatatua kero na changamoto nyingi katika hizo sambamba na kuleta maendeleo ya kiuchumi na kijamii kwa wananchi.

Aidha hakusita kuwawapongeza watendaji  wote kuanzia ngazi ya wilaya, halmashauri na kata na shule kwa kuhakikisha miradi  yote inatekelezwa kwa ubora kwa kuzingatia viwango vinavyoendana na thamani ya fedha zilizotolewa na serikali 'value for money'.

ARUSHA DC