Mwarobaini wa madini ya Floraidi Lemanda wapatikana

Posted on: August 24th, 2018

Kufuatia mikakati ya Serikali ya awamu ya tano, ya kujikita zaidi katika kupambana na  kutatua changamoto sugu zinazowakabili wananchi wake, Serikali kupitia Wizara ya Maji na Umwagiliaji, imetoa mtambo maalumu wa kuondoa kiwango cha madini ya Floraidi yaliyozidi  kwenye maji ya kunywa yanayoyatumia na wananchi wa kijiji cha Lemanda kata ya Oldonyosambu, halmashauri ya Arusha.

Mtambo huo umewashwa rasmi kwa majaribio,  mara baada ya watalamu wa kampuni ya O2andB kuusimika kwenye eneo la shule ya msingi Oldonyosambu, tayari kwa kuanza kuchuja maji ili kupunguza kiwango cha madini ya Floraidi yaliyozidi kwenye maji.

Akizungumza wakati wa kusimika mtambo huo, Mkurugenzi Mtendaji halmashauri ya Arusha, Dkt. Wilson Mahera, amethibitisha kupokea mtambo huo kutoka serikali kuu, mtambo unaojulikana kwa jina la CDI 'Capacity of Dionization system, mtambo uliotengenezwa na Kampuni ya O2andB ya chini Korea.

Amefafanua kuwa mtambo huo una uwezo wa kupunguza kiwango cha madini ya Floraidi yaliyozidi pamoja na chumvi kwanye maji,  kwa kutumia teknolojia ya kisasa ya kuchuja maji bila kutumia kemikali.

Hata hivyo Dk. Mahera amekiri kuwa, mtambo huo una uwezo wa kuchuja maji na kupunguza kiwango cha Floraidi kutoka miligram 18.7 kwa lita moja hadi kufikia miligram 0.37 kwa lita moja, na kuongeza kuwa ni dhahiri kuwa tatizo hilo linakwenda kwisha na kuleta matumaini mapya kwa wananchi wa Lemanda, wananchi ambao wamepata athari kubwa za kimwili na  kisaikolojia kufuatia madhara yatokanayo na kunywa maji yenye madini ya Floraidi iliyozidi kwa miaka mingi.

" Madhara yatokanayo na Floraidi sasa yamefikia mwisho kwa wakazi wa Lemanda, tunategemea sasa wananchi kutumia maji safi na salama yasiyo na Floraidi kama ilivyokua hapi awali" amesema Mkurugenzi Mahera

Naye Diwani wa kata ya Oldonyosambu Mheshimiwa Raymond Lairumbe, ameipongeza serikali ya awamu ya tano inayoongozwa na Dkt. John Magufuli kwa kusikia kilio cha wananchi wa Lemanda,  ambao kimsingi wengi wao wamepata madhara makubwa sana kutokana na kutumia maji yenye kiwango kikubwa cha madini ya Floraidi huku watoto  wakiathirika zaidi mifupa ya miili yao kwa kupinda miguu na kuwa na vichwa vikubwa.

" Nichukue fursa hii kumpongeza mheshimiwa Rais, Doctor John Pombe Magufuli, kwa kuwaonea huruma wananchi wa Lemanda, na serikali ya awamu ya tano kwa ujumla, serikali inayowajali wananchi bila kubagua itikadi zao, leo Lemanda tumepata mtambo wa kuondoa Floraidi kwenye maji " amesema Diwani huyo.

Aidha amewataka wananchi wote wa kijiji cha Lemanda, kuhakikisha wanafika shuleni hapo kuchota maji kwa ajili ya matumizi ya kupikia na kunywa, kwa kuwa madhara ya Floraidi yanatokana na kula chakula kilichopikiwa maji yenye madini hayo pamoja na kunywa maji.

Akizungumza kwa niaba ya wananchi wa Lemanda,  Afisa Mtendaji wa Kijiji cha Lemanda, Gaspa Mollel amesema kuwa, mtambo huo ni muhimu na neema kwa  wananchi wa eneo hilo kutokana na ukweli kwamba, wananchi walikuwa wamekata tamaa ya kupata maji safi na salama, huku akiahidi kuongoza wananchi hao kuutunza mtambo huo, pamoja na kuendelea kuwahamasisha wananchi, juu ya umuhimu wa wananchi hao kutumia maji hayo safi na salama.

Naye Msimamizi Mkuu, Maabara ya Ubora wa maji mkoa wa Arusha, Jovitus Kichumu amesema kuwa, kiwango cha madini ya Floraidi kwenye maji yanayopatikana Lemanda ni miligramu 18.7 kwa lita moja, kiwango ambacho ni kikubwa sana na kisichofaa kwa matumizi ya binadamu na kufafanua kuwa mtambo huo unauwezo wa kuchuja na kupunguza mpaka kufikia kiasi cha miligram 0.37 kwa lita kiwango ambacho kinakubalika kimataifa.

Aidha Mhandisi wa Mitambo wa Kampuni ya O2&B Derick Erastus, amesema mtambo huo unauwezo wa kuchuja lita 20,000 za maji kwa siku na unatumia umeme mdogo wa Volti  1.5V na unauwezo wa kudumu miaka mitano mpaka saba bila kufanyiwa matengenezo.

PICHA ZA MATUKIO WAKATI WA KUSIMIKA MTAMBO HUO.

Mkurugenzi Mtendaji Halmashauri ya Arusha, akizungumza na wanafunzi wa shule ya msingi na sekondari Oldonyosambu juu ya umuhumi wa mtambo huo.

Diwani wa kata ya Oldonyosambu mheshimiwa Raymond Rairumbe akizungumza na wakazi wa Lemanda wakati wa kusimika mtambo wa kuondoa madini ya Floraid kwenye maji.

Wanafunzi wa shule ya Msingi Oldonyosambu wakichota maji yaliyochujwa na kuondolewa madini ya Floraidi mara baada ya mtambo kuwashwa.