Arusha DC inatarajia kupokea Msaada wa magari matano kutoka Ujerumani

Posted on: October 5th, 2018

Halmashauri ya Wilaya ya Arusha inategemea kupokea msaada wa magari matano kutoka kwa Kikundi cha 'Friend of German' la nchini Ujerumani  kwa kushirikiana na shirika lisilo la kiserikali la Help for Maasai Children la nchini Tanzania mapema mwishoni mwa mwezi huu wa Oktoba.

Akizungumza kwa njia ya simu, Mratibu wa Mradi wa shirika hilo ndugu Harld Ppeiffer , ameyataja magari hayo kuwa ni pamoja na magari mawili ya kisasa kwa ajili ya huduma za haraka kwa wagonjwa wa dharura 'Ambulance'  na magari matatu aina ya Nissani kwa ajili ya kurahisisha usafiri kwa watalamu kufika kwenye maeneo ya wananchi wakati wa kutoa huduma.

Hata hivyo katika hali ya kipekee zaidi, Ppeiffer amesema kuwa, Shirika hilo limeamua kuleta magari hayo, kwa kuyaendesha kutoka nchini Ujerumani mpaka nchini  Tanzania, hususani kwenye ardhi ya Halmashauri ya Arusha huku safari yao ikiwa tayari  imeanza tangu tarehe 23.09.2028 na kutarajiwa kukamilika tarehe 17.10.2018.

Amefafanua kuwa, kupitia safari hiyo ya kuleta magari hayo, itakayochukua takribani siku kumi na nne, wadau hao wanategemea kukusanya fedha kiasi cha 'Euro 300,000, fedha ambazo zitakazotumika kwenye ujenzi wa Zahanati ya Oldonyowas iliyopo kata ya Oldonyowas na kiasi kingine kutumika katika shughuli nyingine za Idara ya Afya.

Naye Mkurugenzi Mtendaji, halmashauri ya Arusha Dkt, Wilson Mahera, amethibitisha ujio wa magari hayo kutoka shirika hilo na kusema kuwa, licha ya kulishukuru shirika hilo na serikali ya Ujerumani lakini pia magari hayo yamekuja wakati muafaka kwa kuwa halmashauri ilikuwa inakabiliwa na upungufu wa magari, ulikuwa kwa namna moja au nyingine ulikwamisha utekelezaji wa majukumu kiutendaji.

Amefafanua kuwa, magari manne kati ya hayo matano yatakabidhiwa kwa halmashauri ikiwa ni Nissan mbili  na Ambulance mbili, magari yatakayotumika na Idara ya Afya kwa kutoa huduma za afya kwa wananchi huku gari moja aina ya Nissan litatumiwa na shirika hilo la Help fo Maasai Children kwa ajili ya kusimamia hiyo miradi wanayoitekeleza ndani ya  Halmashauri.

Awali halmashauri ya Arusha imekuwa na uhusiano wa kirafiki na marafiki hao waishio Ujerumani,uhusiano ambao umeleta mafanikio makubwa ambayo, marafiki hao kuamua kuwasaidia wananchi wa Halmashauri hiyo  kwenye sekta ya Elimu, Afya na Maji kwa kupitia shirika la 'Help for Masaai Children'.