MKURUGENZI WA HALMASHAURI YA ARUSHA AWAHIMIZA ASASI ZA KIRAIA KULINDA HAKI ZA WATOTO

Posted on: August 15th, 2025

Mkurugenzi Mtendaji wa Halmashauri ya Wilaya ya Arusha, Bw. Seleman H. Msumi, amezihimiza asasi za kiraia kuhakikisha kuwa haki za msingi za mtoto zinalindwa na kutetewa. Amesema ni wajibu wa kila mdau kushirikiana katika kuhakikisha kuwa kila mtoto analelewa katika mazingira salama na yenye staha.

Bw. Msumi alibainisha kuwa kumekuwa na ongezeko la matukio ya ukatili dhidi ya watoto, jambo linalohitaji hatua za haraka na za pamoja kutoka kwa jamii na taasisi mbalimbali. Alisisitiza umuhimu wa elimu ya jamii kuhusu madhara ya ukatili wa watoto na namna ya kuzuia vitendo hivyo.

Aidha, ametoa wito kwa mashirika yasiyo ya kiserikali, viongozi wa dini, na wazazi kushirikiana kikamilifu katika kulinda haki za watoto. Alisema kuwa mustakabali wa taifa unategemea malezi bora ya watoto, hivyo ni jukumu la kila mmoja kuhakikisha wanaishi bila hofu ya ukatili.