RC MAKONDA ATAKA WATENDAJI WA KATA KUYAELEWA VYEMA MAJUKUMU YAO NA MAENEO YAO YAKIUTENDAJI

Posted on: June 5th, 2024

posted by Ambrose Rashid

Maafisa watendaji wa Kata zote wametakiwa kuijua miradi yote inayotekelezwa kwenye maeneo yao, ahadi za Ilani ya Uchaguzi Mkuu wa 2020/25 kwenye maeneo yao pamoja na kuelewa tija ya miradi husika kwa wanufaika wa miradi hiyo ya maendeleo.

Kauli hiyo imetolewa na Mkuu wa Mkoa wa Arusha Mhe. Paul Christian Makonda leo Juni 04, 2024 wakati alipokuwa akizungumza na wananchi wa Kata ya Mateves wilayani Arumeru, ikiwa ni utekelezaji wa maelekezo ya Katibu Mkuu wa Chama Cha Mapinduzi CCM Balozi Dkt. Emmanuel Nchimbi.

Mhe.Mkuu wa Mkoa ametoa tahadhari hiyo wakati huu akijiandaa kuanza ziara ya Kata zote za Mkoa wa Arusha na kueleza kuwa atakagua miradi ya maendeleo inayotekelezwa kwenye Kata zote za Mkoa pamoja na kusikiliza na kutatua kero mbalimbali za wananchi.

Mhe. Makonda ametoa angalizo hilo mara baada ya kukerwa na uwajibikaji na ufanisi mdogo wa baadhi wa watendaji wa serikali za mitaa na vijiji akisema kuwa baadhi yao wamekosa sifa za kuwatumikia wananchi kutokana na uwajibikaji mdogo kwenye vituo vyao vya kazi.