WAHITIMU JKT OLJORO WATAKIWA KUWA MFANO WA KUIGWA KWENYE JAMII.

Posted on: September 12th, 2023

Na Elinipa Lupembe

Vijana waliohitimu mafunzo ya Jeshi la Kujenga Taifa Oparesheni ya miaka 60 ya Jeshi la Kujenga Taifa, wametakiwa kutumia ujuzi na maarifa waliyopata kipindi cha mafunzo kwa kulitumikia Taifa na kuwa mfano wa kuigwa na vijana wote ndani ya jamii.

Rai hiyo imetolewa na Mkuu wa wilaya ya Arumeru Mhe. Emmanuela Mtatifikolo Kaganda, wakati akifunga mafunzo ya miezi mitatu ya Oparesheni miaka 60 ya JKT, KJ833 Oljoro, kwa kuwataka vijana hao, kwenda kutumia ujuzi na maarifa waliyoyapata kulitumikia taifa la Tanzanzia pamoja na kuwa mfano wa kuigwa na vijana wenzao ambao hawajapata fursa ya kupitia mafunzo haya ndani ya jamii.

Mhe. Emmanuela licha ya kuwapongeza vijana hao, amewasisitiza kwenda kutekeleza kwa vitendo yale yote waliyojifunza ili kutimiza uahalisi wa mafunzo kwa kuonesha utofauti  kati yao na vijana wasioshiriki mafunzo haya kwa kuonesha umahiri na uzalendo kwa nchi yao

"Leo vijana mmeonesha umahiri mkubwa uliotupa taswira ya jinsi wakufunzi wamewafundisha ukakamavu, uzalendo, utiifu na umahiri, mmeitendea haki heshima ya  Amiri Jeshi Mkuu,  mmeonyesha uaminifu kwake kama JKT na jeshi kwa ujumla, hivyo katumieni maarifa haya kulitumikia Taifa na sio vinginevyo" Amesisitiza Mkuu wa wilaya

Ameongeza kuwa, umefika wakati wa kuanza maisha ya kujitegemea, mmepita kipindi cha uangalizi wa wazazi na walimu, sasa mko tayari kujisimamia, tumieni vizuri uhuru wenu kwa kutekeleza majukumu binafsi na yale mtakayopangiwa kwa kuzingatia kanunia taratibu,  sheria za nchi kwa kuheshimu mila na desturi za jamii sambamba  na kuepuka tabia hatarishi ikiwemo matumizi yasiyo sahihi ya mitandao,  yanaweza kuwaingiza kwenye migogoro ya kisheria.

Hata hivyo wahitimu hao, wameishukuru serikali kwa programu hiyo muhimu kwa vijana wa kitanzania na kukiri kujengewa uwezo mkubwa wa kujitambua na kujithamini,  kujiamini na kujitegemea, uzalendo, utiifu, uhodari na umahiri, utakaowawezesha kulitumikia Taifa lao na watanzania kwa ujumla.

Naye Mhitimu 'service girl' Anna Tumainiel Minja, amesema kuwa mafunzo hayo yamewatoa kwenye ulimwengu wa giza na kuwaleta kwenye mwanga ambao utakuwa dira ya maisha yao katika kulitumikaia Taifa la Tanzania

"Wengi tulikuja tukiwa na hofu kumbwa, kumbe mambo ni tofauti, JKT inatoa mafunzo ambayo yanatujengea uwezo mkubwa wa kuwa vijana wenye kulitumikia Taifa kwa uzalendo na sio ubinafsi" Amesema Anna

"JKT imetujenga kiafya na kiakili, tumejifunza kuwa wachapakazi, kuwa wavumilivu katika nyanja zote za maisha, kuwa watii kwa wakubwa na wadogo, kuwa wazalendo kwa nchi yetu, kuwa hodari na mahiri katika kufanya kazi zetu binafsi na zile tutakazopangiwa, ni jambo zuri sana kwa vijana wa kitanzania, tunaahidi kutumikia kiapo tulichokula leo kwa nchi yetu" Eliud Long'idare

Salam Loi Mzazi wa Idd Haruna, ameishukuru Mungu na serikali na kuweka wazi kuwa mwanzo walikuwa na hofu kubwa lakini ameshuhudia mabadiliko makubwa ya kitabia kwa mtoto wake,  amezidisha nidhamu, na amekiri kutamani kijana wake kuendelea kubaki jeshini kuliko kubaki mtaani

Awali kwa mamlaka aliyopewa Mkuu wa wilaya ya Arumeru amefunga mafunzonhayo nprasmi huku jumla ya vijana 3,319 wa kundi la lazima wamehitimu mafunzo ya oparesheni ya miaka 60 ya Jeshi la Kujenga Taifa katika kikosi cha JKT Oljoro.

#KaziInaendelea✍✍

PICHA ZA MATUKIO WAKATI WA KUFUNGA MAFUNZO